പ്രേംചന്ദിന്റെ ജന്മദിനം

ആധുനിക ഹിന്ദി ഉര്‍ദു സാഹിത്യത്തിലെ പ്രധാനപ്പെട്ട എഴുത്തുകാരനായിരുന്ന പ്രേംചന്ദിന്റെ ജന്മവാര്‍ഷിക ദിനമാണ് ജൂലായ് 31 . ഉത്തര്‍പ്രദേശിലെ വാരാണസിക്കടുത്തുള്ള ലമഹി ഗ്രാമത്തില്‍ ഒരു സാധാരണ കര്‍ഷകകുടുംബത്തിലാണ് മുന്‍ഷി പ്രേംചന്ദിന്റെ ജനനം. അച്ഛന്‍ അജായ്ബ് ലാൽ ശ്രീവാസ്തവ പോസ്റ്റ്ഓഫീസില്‍ ഗുമസ്തനായിരുന്നു. അമ്മ ആനന്ദി. ധനപത്‌റായ് എന്നായിരുന്നു പ്രേംചന്ദിന്റെ യഥാര്‍ഥ പേര്. 

    ആദ്യം സ്‌കൂൾ അധ്യാപകനായും പിന്നീട് ഉപവിദ്യാഭ്യാസ ഓഫീസറായും ജീവിതം നയിച്ചു. ഉറുദുവില്‍ നവാബ്‌റായ് എന്നപേരിലായിരുന്നു എഴുതിത്തുടങ്ങിയത്. ആദ്യ കഥാസമാഹാരമായ 'സോസ്-എ-വതന്‍' (ഒരു രാഷ്ട്രത്തിന്റെ വിലാപം) രാജ്യദ്രോഹപരമാണെന്നാരോപിച്ച് ബ്രിട്ടീഷ് സര്‍ക്കാര്‍ കണ്ടുകെട്ടി കത്തിച്ചു. 1910-ൽ ജാമിർപൂർ ജില്ലാ മജിസ്റ്റ്രേറ്റ് പ്രേംചന്ദിനെ സോസ്-എ- വതൻ (ഒരു രാഷ്ട്രത്തിന്റെ വിലാപം) എന്ന തന്റെ ചെറുകഥകളുടേ സമാഹാരം പ്രസിദ്ധീകരിച്ചതിന് ശാസിച്ചു. ഈ കൃതി വിപ്ലവത്തിന് വേണ്ടിയുള്ളത് (seditious) എന്ന് മുദ്രകുത്തപ്പെട്ടു. ഈ കഥാസമാ‍ഹാരത്തിലെ ആദ്യത്തെ കഥ ദുനിയാ കാ സബ്സേ അന്മോൽ രതൻ (ലോകത്തിലെ ഏറ്റവും അമൂല്യരത്നം) എന്ന കഥയായിരുന്നു. പ്രേം ചന്ദിന്റെ അഭിപ്രായത്തിൽ ഈ രത്നം "രാജ്യത്തിന്റെ സ്വാതന്ത്ര്യത്തിനുവേണ്ടി ചൊരിയുന്ന അവസാനത്തെ തുള്ളി ചോര"യായിരുന്നു. സർക്കാർ സോസ്-എ-വതൻ എന്ന കൃതിയുടെ എല്ലാ പ്രതികളും പിടിച്ചെടുത്ത് കത്തിച്ചു. ഇതിനുശേഷം അദ്ദേഹം പ്രേംചന്ദ് എന്ന തൂലികാനാമം സ്വീകരിച്ചു.

    1921-ല്‍ മഹാത്മാഗാന്ധിയുടെ ആഹ്വാനത്താല്‍ പ്രേംചന്ദ് സര്‍ക്കാര്‍ ജോലി ഉപേക്ഷിച്ച് മുഴുവന്‍ സമയ എഴുത്തില്‍ മുഴുകി.19-ാം നൂറ്റാണ്ടിന്റെ ആദ്യദശകങ്ങളില്‍ ശൈശവ വിവാഹ- സ്ത്രീധന സമ്പ്രദായത്തിനെതിരെയും വിധവാ വിവാഹത്തിനനുകൂലമായും ഹിന്ദു-മുസ്ലിം മൈത്രിക്കുവേണ്ടിയും ഭാരതത്തിന്റെ ആത്മാവായ ഗ്രാമത്തിന്റെ നന്മയെയും ഗ്രാമീണരുടെ അനാചാരങ്ങള്‍ക്കെതിരായും തൂലിക ചലിപ്പിച്ചു. പ്രേംചന്ദ് ഹിന്ദിയിലെ 'നോവല്‍ സമ്രാട്ടായി' അറിയപ്പെടുന്നു.

   പ്രേംചന്ദിനു മുന്‍പ് ഹിന്ദി സാഹിത്യം പ്രധാനമായും മതപരമായ കൃതികളിലും ഫാന്റസി കഥകളിലും മാത്രമായി ഒതുങ്ങി നിന്നിരുന്നു. റിയലിസം ഹിന്ദി സാഹിത്യത്തിലേക്ക് കൊണ്ടുവന്നത് പ്രേംചന്ദാണ്. മുന്നൂറോളം കഥകളും 12 നോവലുകളും, അഞ്ച് നാടകങ്ങളും എഴുതിയിട്ടുണ്ട് 'സേവാസദന്‍', 'നിര്‍മല', 'ഗോദാന്‍', 'ഗബന്‍', 'രംഗഭൂമി', 'കര്‍മഭൂമി', 'കായകല്‍പ്' എന്നീ നോവലുകള്‍, 'കഫന്‍', 'പൂസ്‌കീരാത്ത്', ശത്രഞ്ജ്കേ ഖിലാടി' തുടങ്ങിയവയാണ് പ്രമുഖ കഥകള്‍.  ഹിന്ദിയിലും ഉറുദുവിലും വിപുലമായ സാഹിത്യലോകം തയാറാക്കിയ പ്രേംചന്ദ് തന്റെ സാഹിത്യജീവിതത്തിലൂടെ പറഞ്ഞത് ദരിദ്രരുടെയും കര്‍ഷകരുടെയും ജീവിതമാണ്. ഒരു കാലഘട്ടത്തിന്റെ ഗ്രാമീണ ജീവിതമായിരുന്നു പ്രേംചനിഥിന്റെ കഥകള്‍.